Agora, Husi Dili Ba Distritu Seluk Bele Uja Aviao Lokal Ho Folin Tiket $30 - $60

Written by CJITL Editor

Tuesday, 30 March 2010

CJITL flash, Kompanha AustAsia ne’ebe durante ne’e hala’o ona operasaun iha Timor-Leste, liu husi aviaun Silk Air ne’ebe semo ona husi Dili-Singapura, agora dadaun hamutuk ho kompanha CESSINA AIRCRAFT CORPORATION husi Estadu Unidos Amerika, hala’o hela esforsu hodi oferese transporte aviaun ne’ebe sei semo lokalmente husi kapital Dili ba distritu balun iha Timor-Leste. Terca ohin, kompanha ne’ebe refere konvida Prezidente Republika, Jose Ramos-Horta hodi koko hala’o viazen ho aviaun husi kompanha ne’e nian durante maizumenus minutus 90 nia laran, ba iha dirasaun distritu Manatuto, Baucau, Lospalos, no Viqueque. Hafoin ramata tiha hodi semo ho aviaun ne’e, Prezidente Republika hateten katak nia sujere ba Governu atu hahu hanoin ona hodi oinsa bele halo kontratu ho kompanha ne’e hodi aluga aviaun refere hodi nune’e bele fasilita transporte ba komunidade no entidades sira seluk iha nasaun ida ne’e, liu-liu wainhira misaun UNMIT no FSI nian remata iha 2012. “Hahu husi tinan 2 liu-ba hau sujere ona ba Governu atu oinsa hahu hanoin ona hodi aluga aviaun ki’ik no helikoptru ho kuantidade 2 ou 3, hodi nune’e bele ajuda fasilita aktividades Governu no komunidade nian iha teritoriu laran liu-liu wainhira ONU no FSI ramata ninia misaun iha 2012,” hateten Prezidente Ramos-Horta. Tuir Komunikado, Oras ne’e dadaun, kompanha AustAsia hein hela aprovasaun husi Governu Timor-Leste hodi nune’e sira bele hahu operasaun aviaun ne’e nian. Tuir planu ne’ebe iha, aviaun refere sei hala’o ninia operasaun husi sidade Dili ba distritu sira hanesan; Enklave Oecuse, Suai, Bobonaro, Viqueque, Baucau, no Lospalos. Aviaun ne’e bele lori pasejeiru hamutuk na’in 12 no sasan ho todan total 1.275 kg. Folin husi bilhete ba pasajeiru ida-idak mak 30-60 Dolares Amerikanu ho durasaun viazen entre minutu 15 to’o 30 nia laran. (*/CJITL)

Source: http://cjitl.org/index.php?option=com_content&task=view&id=1202&Itemid=1